13 October 2007

كل سنه و أنتو طيبين


السلام عليكم
كل سنه و إنتم طيبين بمناسبة عيد الفطر المبارك

أنا عارف إنتو دلوقتي بتعيدوا و فرحانين ، إنما أنا لأ، ليه ؟؟

أنا دلوقتي قاعد بسطب برنامج مدوختي شويتين !!

القصه و ما فيها إني عندي جهازي بطئ شويه و الابونتو عليه بيكون بطي، فقلت لما أستخدم سلاكوير، أهو منها الواحد يستخدم التسخه الاحترافيه دي(سلاكوير نسخه إحترافيه عالية المستوي و كما يقولون " من يتعلم توزيعه معينه فإنها يكون قد تعمها هي أما من يتعلم سلاكوير فإنه يكون قد تعلم اللينوكس") المهم ، كان عندي سلاكوير 11 من فتره و كنت سطبتها قبل كده ، فروحت شايل الأبونتو و مسطب سلاكوير، مكدبش عليكم بسبب عدم فهم اعدادات التسطيب حصل مشكله صغنونه بس الحمد لله بفضل الله ثم بمساعدة المنتدي الجميل ده تغلبت عليها .

بعد ماسطبتها روحت على طول عشان أسطب بيئة التشغيل جنوم، اصل الراجل الطيب صاحب التوزيعه شايل جنوم منها و جاعل سطح المكتب الافتراضي كدي ، أنا عارف إنه مستقصدني عشان أنا في حياتي مكرهش قد سطح المكتب ده.

في كام مشروع كده بيخليك تسطب جنوم للسلاكوير و أشهرهم واحد إسمه "دروبلين جنوم"، روحت الحمد لله مسطبه و بدأت بقه في العمل على معشوقي اللينوكس

التوزيعه معاها برامج كتيييير جدا، من قارئات بي دي إف لملفات صوت لملفات ميديا ل ... ل.... ل ....، بصراحه توزيعه غنيه جدا، بس بما إني بحب قارئ بي دي إف معين ) إسمه إفيانس ( فروحت عشان أسطبه، و من هنا بدأ المشوار

و هو الموقع الرسمي للحصول على برامج السلاكوي linuxpackages.net روحت

لما روحت الموقع و بحثت عن البرنامج فلم أجده ، خير خير.

طبعا إنتو عارفين إن السلاكوير غاويين يغلبوا المستخدمين شويه، في أبونتو و فيدورا و توزيعات كتير كل اللي عليك إنك تطلب البرنامج بس و هما بيقومو بالباقي، يعني مثلا في أبونتو لو عاوز تسطب ريالبلاير تطلب منه و تقوله واد يا عثمان، سطبلي الريال بلاير ، كده :

sudo apt-get install realplayer

بس فيروح الواد عثمان قايم بالباقي!

أما السلاكوير موش كده، مفيهاش خدامين، هلب يور سلف و إنجز!!

دورت في موقع المنتدي السابق زكره على خدامين للسلاكوير و الحمد لله لقيت 3 موش واحد بس، بس قالولي خلى بالك، العيال دي لسه جديده و مسنوده حبتين، فيمكن ينفضولك و ميقضولاكش حاجتك،قلت لما أجرب

أول خدام إسمه سلابت جت، روحت جبته و جربته بصراحه خزلني،

الخدام التاني إسمه سويرت، رحت جبته و كلته تمام بس المشكله إنه مبيعرفش يقضي كل الطلبات و لسوء الحظ معرفش يجبلي البرنامج اللي أنا عاوزه.

قلت لنفسي مبدهاش، نرجع بقه لأصل اللينوكس، أبني البرنامج من الشفره المصدريه!!!!!!!

وأنا أهه قاعد بقالي بتاع ربع ساعه بعمله كوبايل ) ترجمه ( و مستني - البرنامج ده يتسطب في دقيقه و نص لو كان ملف تشغيل ) بيناري (

دعواتكم إنه ميرخزلنيش زي عادته أصلي معظم البرامج اللي بحاول أبنيها من الشفره المصدريه بتخزلني :S !!!!!

وكل عام و أنتم بخير


Post a Comment