بعنوان المرادي بقه

السلام عليكم

فى لحظه ما، من هذا اليوم، شعرت بأني يجب ان أكتب ( معلش يا جماعه لو كان إسلوبي شويه تقيل ع المعده ) المهم، بقول أني شعرت أني أريد أن أدون، أريد ان أحكي لكم همي و غمي فأنا تقريبا منذ إمتحانات التيرم التاني في السنه النهائيه ( السنادي يعني ) يعني بقالي حوال 3 شهور لم أقرأ في كتاب واحد، شفتم خيبه ما بعدها خيبه أصلي بهوا مزاكرة العملى أثناء فترة الدراسه ، اما بقه ايام الامتحانات فأنا راشق عالنت و خصوصا المنتدي الجميل ده ( الفريق العربي للبرمجه ) بجد أنا أكتر وقت كنت بقضيه ع النت أيام الامتحانات، يمكن عشان موش لاقي حاجه أعملها، ممكن.

أنا كما لعلكم تعرفون أنتي ميكروسوفتاوي قد الدنيا، أحب اللينوكس جدا ( على فكره انا بكتب من على الويندوز دلوقتي ، قصه كبيره هحكلكواعيها بعدين ) المهم، انا كمان بعشق الجافا على الرغم من إني معرفش غير جافا(الاستندرد إدش ) و جي إس بي و فاهم شويه يعني إيه إسترتس و على الرغم من إني مقرتش فيهم تقريبا أي حاجه، أنا المفروض دلوقتي كنت خلصت ال إسترتس ع الاقل بس الحمد لله رب العالمين لعله خير من ربنا و أكيد هو خير طبعا.

أنا على الوجه الاخر بكره و بستخف و بستحقر منتجات المدعوه الاخت ميكروسوفت ، بجد بستهيفها جدا، يعني مثلا البعبع أي إس بي دوت نت عامله زي أهبل حاجه في الجافا (الجي إس إف ) بل أسمع ان ال جي إس إف أصعب كمان !
المهم ربنا رزقني من حوالي شهرين بشغلانه جي إس بي و إتحولت ل أي إس بي دوت نت ، بجد فرحت جدا، و خصوصا إني قبل مشتغل كنت بدأت أتعلم السي شارب يعني بدأت أقرا الفروق بينها و بين الجافا أو بالاصح بدأت أقرا إزاي ميكروسوفت إحتالت و إيه التغيرات اللي عملتها على الجافا عشان تطلع بالسي # ( الجماعه عشاق ميكروسوفت و منتجتها ياريت مايزعلوش ، ده رأي و أنا بعبر عنه ).

وطبعا طبقا للمثل القائل " من تعلم لغة قوم أمن مكرهم " بدأت أحب الدوت نيت و اتعلمه.
بجد الدوت نيت ممتع جدا، بس برضه هايف جدا.

المهم من ساعتها بقه بقيت طول النهار بعيد عن حبيبي اللينوكس و طبعا بعيد عن الجافا وقاعد خلقتي في خلقة الويندوز و الدوت نيت.

طبعا أثناء الشغل الواحد كان سويعات يقرا في الدوت نيت، و شويه بي إتش بي ، و طبعا مهمل الجافا جدا.

بس موش عارف أقول إيه، بس أنا أهوه سبت الشغل ( عشان النيله الجيش ) و لحد دلوقتي برضه مبزاكرش جافا ( ولا حته غير جافا ) بس إن شاء الله إن شاء الله بعد الجيش الواحد بقه يبقي يكمل مزاكرة جافا ( إبقي قابلني !! )

بس بجد من أحلى الفترات اللي مرت بيه فترة الشغل، الواحد إنطحن في البدايه ( و لحد ما سبته وأنا مطحون ) بس بجد إتعلم يعني إيه شغل، بجد إتعلمت حاجات كتيير جدا، من حاجات تقنيه لحاجات في التعامل مع الناس و غيره و غيره و غيره.

أخر أخباري بقه إني بشرح لواحد صاحبي عزييييز عليا قوي قوي قوي شوية جافا كده على ما قسم. يعني أصلي بعزه جدا. أدعولي إني بجد أعرف أخدمه .

بس و عاوز بجد و الله أزاكر ، دعواتكم معانا يا ناس أصلي زي ماقلتلكم مأنتخ من ساعة الامتحانات لابزاكر ولا بهبب .

بس والسلام ختام،،
له بقيه إن شاء الله.........