ميكروزفت ويندوز.... الأحمق دائم

بسم الله الرحمن الرحيم

المقاله دي أنا كتبتها أيام إمتحانات العملي التيرم الأول ، إسمحولي أفتتح بيها البلوج :

ميكروزفت ويندوز.... الأحمق دائما....

السلام عليكم و رحمة الله و بركاته....

نعم ميكروزفت ويندوز الأحمق دائما. إنه نظام تشغيل خنيييق بمعني الكلمه, بسبب ما يواجهني و يواجه كل واحد منا من مشاكل و مشاكل و مشاكل و مشاكل لا اخر لها.

سأحكي لكم أخر صولاتي و جولاتي مع هذا النظام الغبي لكيلا أطق من الغيظ فأرجو من الله أن أجد عندكم سعت الصدر لكي تستمعو لحكايتي للنهايه, و لسوف تعزروني............................

أولا أنا كان عندي شوية فيروسات ع الجهاز ( كعادة الويندوز) مطلعين عيني معاهم، جربت أخر نسخه من ال أفيج أنتي فيرز مفيش فايده طب ال مكافي برده مفيش فايده.

أنا عامل مشروع الجافا حاجه كده زي ال فيديو ستريمينج بس هو موش بالظبط كده، المهم كنت شغال تمام التمام بفضل الله عليَ ع الينوكس (اللي ربنا منَ عليا و هاجارتله من حوالي سنه، ربنا يمن عليكم يا رب و تسيبو البتاع الغبي ده اللي اسمه الويندوز) لحد كده تمام، بس المشكله اللي واجهتني أني عاوز أشغل ال جي-إم-إف عشان أشغل الفيديو في المشروع، فقريت في كتاب إن ال جي-إم-إف بعتمد علي المنصه (البلات فورم ) اللي انت شغال عليها، فإفتكرت إني كنت مجربه قبل كده ع الوينوز فقلت أروح بقي لحبييب روحي الوندوز بدل مجربه ع الينوكس و أضيع و قت، قلت لما بقي أكمل شغل ع الويندوز مادام هو جامد كده . المهم تنييت أشتغل طول الليل و جيت داخل نايم.

تاني يوم الصبح بفتح اللينوكس عشان أبص علي الشغل ملقتش حاجه من اللي أنا عملته إمبارح طول الليل. قلت هو اللينوكس خرف ولا إيه لم أدخل ع الويندوز، دخلت فوجئت بإن كوووووووول الشغل طار، أيوه طار - عمرك شفت حاجه بتطير من غير أجنحه - المهم قلت لنفسي الحمد لله، قدَر الله و ماشاء فعل, لعله خير،لما أقعد أكتبه من تاني و هو بالمره تدريب لنفسي بس المرادي ع اللينوكس. المهم كملت تقريبا المشروع (أنا شغال ع النت بينز - حتي النت بينز بتاعت الويندوز عقيمه زيه) قلت بقي لم أدخل أجربه علي حبييييبي , انت عارفينه طبعا.

المهم فتحت الويندوز و بفتح النتبينز موش عاوز ينطق لا من فوق ولا من تحت، جيت شايله و مسطبه من جديد، بفتحه برضه موش عاوز ينطق. أنا عارف إن قرف الويندوز ده موش واقته خالص بس العيب عليا أصل و أنا بوافق علي الاتفاقيه (لما بتيجي تسطب ويندوز مفروض انك بتوافق علي اتفاقية الشراء) مإشترطتش عليهم إنه مايخنوقش عليا فى أيام امتحانات العملي، ما أنا اللي غلطان المره الجايه و أنا بسطبه ( إن شاء الله موش حاتحصل أبدا) هشترط عليهم. المهم أهو أنا قاعد دلوقتي جنبه و بعمله سكان بال نورتون ، أنا عارف انه موش هيطلع فيروسات و لا حاجه, بس خلينا ولا الويندوز لحد باب الدار.

ناهيك عن القفشات اللي بيعملها كل شويه، أبقي شغال فى أمان الله ألاقي اللي قفش عليا و لازم لما الويندوز باشا يقفش أعمله رستارت و موش مشكله الشغل اللي أنا أشتغلته خليه يطير هو التاني.

ممكن واحد يرد عليا يقولي، بس ياعم إنت، الويندوز سهل و جميل و اللي عارفينه أحسن من اللي منعرفوش، أقولك لابقي اللينوكس برضه سهل (جربت النسخه الجديده من أبونتو : ubuntu.com ؟ سيبك من رد هات, دي معموله للشركات بس) و أجمل بمراحل و أقوي و مفهوش فيروسات و مش كل لما أجي أسطب برنامج يقولي رستارت و ...و ....و ..... دا أنا فاكر إنه كان عندي قاموس، بقول قاموس يعني حاجه كده حوالي شاشه واحده بس، كل لما أجي أسطبه يقولي اعمل ريستارت، حتي القاموس يا ويندوز.

دا أنا فاكر أني أول ما اشتغلت ع الينوكس اشتغلت علي رد هات 9.0، بعد حوالي 5 أو 6 شهور و يمكن أكتر كل اللي زاد عليها هو البرامج اللي بسطبها بس ، مفيش تقل الويندوز ولا إن كل شويه يعمل رستارات ولا حاجه من غباء الويندوز, شوف بقي لو كان ويندوز ده, كان رخَم و خنق و مات و هنج كل شويه و اتملي فيروسات و.. و.. و ..

شِكرا علي سعة صدوركم

و الحمد لله رب العالمين..........

علي فكره يا جماعه دي كانت حاجه في صدري حبيت أفك عن نفسي بإني أحكيلكم و هو الواحد لو محكاش ليكم هيحكي لمين، و أنا موش مستعد أن أدخل في أي مناظرات عن اللينوكس أو الويندوز أولا موش واقته ثانيا أنا ياما داخلت مع ناس كتييييييير في مناظرات و موصلناش لحاجه ف النهايه ، فى الأول والأخر نظام التشغيل ده ارتياح نفسي، النظام اللي أنا برتاح عليه هشتغل عليه.